Viljayfirlýsing vegna álvers á Bakka framlengd

Fulltrúar Alcoa, ríkisstjórnarinnar og Norðurþings framlengdu í dag viljayfirlýsingu um rannsóknir á hagkvæmni þess að reisa álver á Bakka við Húsavík, til 1. október árið 2009. Um er að ræða framlengingu og uppfærslu á viljayfirlýsingu þessara aðila sem undirrituð var í maí 2006 eins og segir í tilkynningu frá aðilunum þremur.

Þar kemur fram að fyrsta og öðrum hluta hagkvæmniathugana vegna álversins sé lokið og niðurstöður þeirra hafi gefið tilefni til að haldið yrði áfram með verkefnið. Ákveðið hafi verið að framlengja vinnu við þriðja hlutann til 1. október á næsta ári til þess að hægt verði að ljúka þeim verkefnum sem aðilar settu sér 2006 áður en lokaákvörðun verður tekin um byggingu álvers á Bakka. Áfram er gert ráð fyrir því að álver á Bakka nái fullum afköstum árið 2015 verði niðurstaða athugana jákvæð.

Meðal þess sem unnið verður að næsta eina og hálfa árið er mat á umhverfisáhrifum og þá mun Alcoa halda áfram viðræðum við orkufyrirtæki. Auk þess verður rannsóknum á efnahagslegum og samfélagslegum áhrifum álvers í sveitarfélaginu og nágrenni lokið, lögð verða fram gögn fyrir starfsleyfi álvers, unnið verður að útfærslu á hafnaraðstöðu og fleira.

Samhliða framlengingu á viljayfirlýsingu ríkisstjórnarinnar, Alcoa og Norðurþings hefur verið unnið að framlengingu á viljayfirlýsingum Alcoa og Landsvirkjunar um raforkusölu og Alcoa og Landsnets um orkuflutning.