Koma á fót miðstöð um samfélagslega ábyrgð fyrirtækja

Komið hefur verið á fót fræðslu- og rannsóknarmiðstöð um samfélagslega ábyrgð fyrirtækja hér á landi. Háskólinn í Reykjavík stendur að miðstöðinni ásamt sex íslenskum fyrirtækjum og utanríkisráðuneytinu.

Markmið miðstöðvarinnar verður að efla getu fyrirtækja á Íslandi til að sýna ábyrgð gagnvart samfélaginu, umhverfi sínu og mannréttindum í daglegum rekstri eins og segir í tilkynningu. Forsvarsmaður miðstöðvarinnar er Páll Ásgeir Davíðsson, sérfræðingur í lagadeild HR.

Samfélagsleg ábyrgð fyrirtækja var í rædd á fundi sem samráðsnefnd atvinnulífs og stjórnvalda um utanríkisviðskipti og útflutningsaðstoð stóðu fyrir í morgun. Á fundinum var meðal annars rætt um aðild fyrirtækja og stofnana að Global Compact sem er vettvangur Sameinuðu þjóðanna fyrir samfélagslega ábyrg fyrirtæki, en meira en 4000 fyrirtæki og þar á meðal fjöldi erlendra stórfyrirtækja eru aðilar að að þeim vettvangi.