Byrjaði smátt og bætti við

Bílastæði eru hluti af andliti fyrirtækja út á við. Ýmsir hafa falið BS verktökum umsjá þeirra.

„Við málum línur á bílastæði, sópum þau og gerum við malbik og kantsteina auk þess að setja upp skilti. Þetta er eina fyrirtækið hér á landi sem hefur þetta allt á einni hendi,“ segir Bjarni Hilmar Jónsson, forstjóri BS verktaka, þegar hann er spurður út í starfsemina.

Fyrirtækið hefur verið starfandi í tuttugu ár og umsvifin aukast stöðugt enda bílum alltaf að fjölga. „Ég veit ég tala eins og gamall maður en fyrir tuttugu árum var fljótlegt að ná sér í pening með því að mála bílastæði,“ segir Bjarni glaðlega. „Það var engin yfirbygging, engin flókin tæki og ekkert vesen. Ég gekk bara hús úr húsi og bauðst til að mála stæðin, aðallega hjá fyrirtækjum. Í fjölbýlishúsum er vafstrið meira því hússtjórnir þurfa að funda um allar framkvæmdir.

Starfsmenn BS verktaka eru sjö í dag að sögn Bjarna og tækjakostur hefur aukist: „Við málum hvítu línurnar með gatnamálningarsprautu, svo erum við með sagir, malbiksflutningavagna og valtara fyrir viðgerðirnar. Vorið er annatími því bílastæðin láta á sjá eftir veturinn. „Snjómoksturstækin brjóta kant­steina og eftir vetur eins og þann sem er nýliðinn er mikið að gera í kantviðgerðum,“ segir Bjarni. Þess má geta að heimasíða fyrirtækisins er verktakar.com.

gun@frettabladid.is