Jeppi valt á Reykjanesbraut

Lítill jeppi sem var á leið frá Reykjanesbæ til Hafnarfjarðar um ellefuleytið í gærkvöldi valt rétt við álverið í Straumsvík. Bílstjórinn missti stjórn á jeppanum sem var á rúmlega 80 kílómetra hraða en mikil hálka var á þessum vegarkafla í gærkvöldi.

Þrennt var í bílnum, móðir og tveir synir hennar, og slöðusðust þau öll frekar lítið. Þau voru engu að síður flutt með sjúkrabíl á slysadeild þar sem annar sonurinn fór í myndatökur. Jeppinn er talinn ónýtur.

Brotist var inn í iðnaðarhúsnæði við Klettháls í nótt. Þremur vélsleðum var stolið og ekið á brott. Lögregla rakti slóð sleðanna og fann þá skömmu síðar skammt frá iðnaðarhúsnæðinu. Þjófunum virðist hafa snúist hugur og stungið af því þveir voru á bak og burt þegar lögreglan kom að sleðunum. Þeir eru enn ófundnir.

Lögreglan á Selfossi stöðvaði bíl í almennu eftirliti undir miðnætti á gatnamótum Skeiðavegar og Suðurlandsvegar sem reyndist vera fullur af þýfi. Talið er að þýfið komi úr nokkrum sumarbústöðum við nágrenni Flúða.

Fjórir ungir karlmenn eru í haldi lögreglu í þágu rannsóknar málsins. Töluverð verðmæti eru í þýfinu en lögreglan á Selfossi veit ekki úr hvaða bústöðum þýfið kemur. Hún hvetur því sumarbústaðaeigendur til að huga að bústöðum sínum.