Útboð íslenska ríkisins ólögmætt

Hæstiréttur dæmdi útboð íslenska ríkisins á Íslenskum aðalverktökum ólögmætt með dómi á fimmtudag.

Í 24 stundum í dag segir að Hæstiréttur hafi komist að því að jafnræðis hafi ekki verið gætt milli þeirra sem buðu í þetta ríkisfyrirtæki sem einkavæðingarnefnd sá um á sínum tíma að koma í sölu. Hæstiréttur segir að fyrirtækið hafi ekki verið selt til hæstbjóðenda. JB byggingarfélag, eða Jarðboranir, og Trésmiðja Snorra Hjaltasonar kærðu útboðið.

Hæstiréttur dæmir fyrirtækjunum aftur á móti ekki skaðabætur, þar sem þau hafi heldur ekki verið með hæsta boð í Íslenska aðalverktaka. Íslenskir aðalverktakar voru um áratuga skeið með einokun á öllum framkvæmdum fyrir bandaríska herinn á meðan hann var með viðveru á Íslandi.