Nýja Kópavogslaugin kostaði milljarð

Þorgerður Katrín Gunnarsdóttir menntamálaráðherra opnaði ný sundlaugarmannvirki í Sundlaug Kópavogs við Borgarholtsbraut við hátíðlega athöfn í gær. Var opnunin rúsínan í pylsuendanum á menningarhátíð Kópavogsbæjar, svonefndum Kópavogsdögum.

Gunnar Birgisson, bæjarstjóri Kópavogs, hélt ávarp við opnunina og kom þar fram að heildarkostnaður við nýju sundlaugina væri nær milljarði króna. Hefði bærinn varið sem að meðaltali næmi um milljarði á ári til byggingar íþróttamannvirkja árin 2002 til 2008 en heildarkostnaðurinn við þann lið væri á sjöunda milljarð króna á tímabilinu.

Ómar Stefánsson, formaður bæjarráðs Kópavogs, lét þau orð falla að góð aðstaða til fjölbreyttrar afþreyingar skilaði sér í ánægðari íbúum og nú hefðu á einni viku þrjú mannvirki verið tekin í notkun í bænum, ungmennahús, áhorfendastúka við Kópavogsvöll og sundlaugin.

Séra Ægir Sigurgeirsson blessaði mannvirkin og Skólahljómsveit Kópavogs lék. Af þessu tilefni er í dag ókeypis í sund í Sundlaug Kópavogs og Versölum.

Samkvæmt upplýsingum frá Kópavogsbæ eru helstu tölulegar staðreyndir laugarinnar þessar:

 

 

Allt vatn er upphitað kalt vatn

 

Vatnsrör og önnur rör 18.000 m

 

Rafmagns- og stýrilagnir 40.000 m

 

Steypumagn 1.800 m³

 

Steypustyrktarjárn 190.000 kg

 

Heitavatnsnotkun 16 l/s eða 58 m³/klst., eins og 200 einbýlishús

 

Vatn í nýjum pottum og laugum 725 m³

 

65 dælur fyrir nýju laugarnar

 

Vatn í 50 m lauginni 1.800 m³

 

Hreinsikerfi fyrir nýju pottana og laugarnar (hringrás) 475 m³/klst.

 

Hreinsikerfi fyrir 50 m laugina (hringrás) er 360 m³/klst.

 

Kaldavatnsnotkun (mesta samtímarennsli) er 16 l/s eða 58 m³/klst.

 

Vatnsrennsli í nýju vatnsrennibrautunum er 250 m³/klst.

 

Loftflæði loftræstikerfis 55.000 m³/klst.