Málaferli erfið leið fyrir SÁÁ

Ari Matthíasson framkvæmdastjóri SÁÁ segir að samtökin eigi mikið undir samstarfi við Reykjavíkurborg og ríkið sem kaupi ákveðna þjónustu af samtökunum. Af þeim sökum sé ,,erfitt að standa í stjórnsýslukærum gagnvart þessum aðilum."

Ákvörðun velferðarráðs Reykjavíkur og rökstuðningur sviðsstjóra ráðsins um að ganga til samninga við Heilsuverndarstöðina í stað SÁÁ um rekstur áfangaheimilis er að mati Ara óskiljanleg. Ekki hefur verið tekin ákvörðun um næstu skref. Ari telur að kærunefnd útboðsmála og umboðsmaður Alþingis geti tekið málið fyrir.

Innri endurskoðun vísaði í rökstuðning sviðsstjóra

Ekki voru allir á eitt sáttir með ákvörðun velferðarráðs og fór Þorleifur Gunnlaugsson borgarfulltrúi VG fram á að innri endurskoðun Reykjavíkur skoðaði málið. Tilboð SÁÁ í rekturinn var lægra en tilboð Heilsuverndarstöðvarinnar. Innri endurskoðun telur málefnalegar forsendur liggja að baki ákvörðuninni en tekur jafnframt undir þau sjónarmið að ávallt skuli gæta fjárhagslegrar hagkvæmni við innkaup. Í álitinu er vísað í rökstuðning sviðsstjóra velferðarsviðs fyrir samningnum.

,,Ég er sár og reiður"

Að mati Ara kemur tvennt til greina. ,,Annað hvort býr eitthvað annarlegt að baki eða að þeir sem fjalli um málið séu óhæfir. Ég veit ekki hvort er verra."

,,Ég er sár og reiður fyrir hönd SÁÁ því mér finnst í rökstuðningi sviðsstjórans vera vegið af starfsemi og starfi okkar. Það mun vera það lélegt að það þykir sjálfsagt að borga meira til einhvers sem hefur enga reynslu í málaflokknum," segir Ari.

Þeir sem hafa fjallað um málið að hálfu Reykjavíkurborgar hafa gert það af ,,slíkri vanþekkingu um aðferðarfræði og hugmyndafræði SÁÁ að það verður þeim til ævarandi háðungar," segir Ari.