Ekkert spurst til týndrar dóttur

Helen Halldórsdóttir leitar enn fimmtán ára gamallar dóttur sinnar sem hún hefur ekki séð síðan á föstudag. Vísir sagði frá leit Helenar á mánudaginn en ekkert hefur frést til stúlkunnar sem heitir Sara Dögg. Hún er ljóshærð, um 155 sm á hæð og var klædd í gráa hettupeysu, ljósar gallabuxur og ljósbrún loðstígvél.

„Ég er búin að fá nóg. Hún þarf að fá hjálp stúlkan. Hún er í afar slæmum félagsskap og ég vil koma henni í neyðarvistun inn á Stuðla," sagði Helen áhyggjufull í samtali við Vísi á mánudaginn. Dóttir hennar hefur áður látið sig hverfa fyrir skömmu og var þá týnd í tvo sólarhringa.

"Ég gaf lögreglunni og barnaverndarnefnd upp heimilisfangið þar sem hún dvaldi um síðustu helgi en ekkert var gert. Lögreglan vísar á barnaverndarnefnd sem vill ekkert gera í málinu strax. Lögreglan hefur úrræði til að koma henni í neyðarvistun á Stuðla og það er það sem ég vil. Ég ætla ekki að horfa á eftir stúlkunni inn í heim harðra fíkniefna," sagði Helen við Vísi.

Þeir sem hafa einhverjar upplýsingar um Söru Dögg eru beðnir um að hafa samband við Vísi á netfangið ritstjorn@visir.is eða í síma 512-5200.