Móðir lýsir eftir dóttur sinni - vill að lögreglan finni hana

Helen Halldórsdóttir hefur ekki séð fimmtán ára dóttur sína síðan á föstudaginn. Hún segir lögregluna alltaf vísa á barnaverndarnefnd. Dóttir hennar, sem heitir Sara Dögg er fimmtán ára, ljóshærð, um 155 sm á hæð og var klædd í gráa hettupeysu, ljósar gallabuxur og ljósbrún loðstígvél.

„Ég er búin að fá nóg. Hún þarf að fá hjálp stúlkan. Hún er í afar slæmum félagsskap og ég vil koma henni neyðarvistun inn á Stuðla," segir Helen áhyggjufull. Hún vill að lögreglan finni dóttur sína og komi henni í meðferð. „Þetta gengur ekki lengur," segir Helen um dóttur sína sem hvarf einnig um síðustu helgi og var þá týnd í tvo sólarhringa.

"Ég gaf lögreglunni og barnaverndarnefnd upp á heimilisfangið þar sem hún dvaldi um síðustu helgi en ekkert var gert. Lögreglan vísar á barnaverndarnefnd sem vill ekkert gera í málinu strax. Lögreglan hefur úrræði til að koma henni í neyðarvistun á Stuðla og það er það sem ég vil. Ég ætla ekki að horfa á eftir stúlkunni inn í heim harðra fíkniefna," segir Helen.