Aðstoðarmaður Jóhönnu gagnrýnir forseta ASÍ

Hrannar Björn Arnarsson, aðstoðarmaður Jóhönnu Sigurðardóttur félagsmálaráðherra, gagnrýnir Gylfa Arnbjörnsson, forseta ASÍ og segir hann ekki spara stóryrðinn í umfjöllun sinni um fjárlögin.

,,Ég skil hinsvegar ekki hvað honum gengur til enda virðist orðaflaumurinn í litlu samhengi við innihald fjárlaganna, amk hvað varðar hag hinna verst settu," segir Hrannar í pistli á heimasíðu sinni.

Fjórir milljarðar teknir af fátækum

Gylfi hefur gagnrýnt tillögur ríkisstjórnarinnar harðalega. Í Fréttablaðinu í dag segir hann að stjórnvöld skvetti köldu vatni reglulega á þjóðina og forystu verkalýðshreyfingarnar. ,,Það á að taka fjóra milljarða af fátækasta fólkinu. Þetta er svo rosalega ósanngjarnt að við getum ekki kvittað upp á það," segir hann.

Elli- og örorkulífeyrisþegar búa við verðtryggðan lífeyri og eiga að fá hækkun í hverjum mánuði. Gylfi bendir á að ríkisstjórnin ætli nú að hækka bætur þeirra aðeins um 9,6%, ekki sem nemur verðtryggingunni.

Fylgir þróun verðlags

Hrannar segir að samkvæmt fjárlagafrumvarpinu muni allar bætur lífeyrisþega hækka um 9,6% um áramótin. Sama eigi við um frítekjumörk og viðmið sem lúta að útreikningi bótanna. Hann fullyrðir að umrædd hækkun mun bæta að fullu þróun verðlags yfirstandandi árs og veita talsverða viðspyrnu inn í næsta ár.

,,Það sem skiptir hinsvegar mestu máli, og Gylfi virðist algerlega líta framhjá, er að lágmarksframfærslutrygging lífeyrisþega mun hækka um 19,9% um áramótin og fara úr 150.000 í 180.000 ef fjárlagafrumvarpið verður samþykkt óbreytt," segir aðstoðarmaðurinn og bætir við að fjórðungur lífeyrisþega mun njóta umræddrar tryggingar ef af líkum lætur.

Átti von á að að forsetinn myndi fagna

,,Hvernig í ósköpunum getur forseti ASÍ haldið því fram að ráðist sé að öldruðum og öryrkjum sem verst standa í ljósi staðreyndanna," spyr Hrannar.

Hrannar segir að öllum hljóti að vera ljóst að með með fyrirliggjandi fjárlögum er ríkisstjórnin að gera sér sérstakt far um standa vörð um kjör hinna verst settu. ,,Ég átti satt best að segja von á því að því myndi talsmaður ASÍ fagna."

Pistil Hrannars er hægt að nálgast hér.