Sjö sagt upp í stjórnsýslu heilsugæslunnar

Að sögn Svanhvítar Jakobsdóttur, setts forstjóra Heilsugæslu höfuðborgarsvæðisins, voru uppsagnirnar liður í því að endurskoða verkferla innan stofnunarinnar eins og hún orðar það. „Við vorum í reynd með tvöfalda símsvörun og svo höfum við verið að endurskipuleggja ferla í bókhaldi og fjárreiðum og varðandi umsjón fasteigna," segir Svanhvít.

Hún segir sjö manns hafa verið sagt upp innan stjórnsýslunnar en tveir til viðbótar voru færðir til í starfi. Á bilinu 40-50 manns vinna við stjórnsýslu Heilsugæslunnar og því lætur nærri að fimmtungur starfsmanna hafi misst vinnuna eða verið færður til í starfi. Svanhvít segir að hluti starfsfólksins,sem sagt var upp,hafi biðlaunarétt og hafi því hætt strax en aðrir séu með þriggja til sex mánaða uppsagnarfrest.

Stjórnarandstaðan á Alþingi hefur gagnrýnt að fjármuni skorti til heilsugæslunnar. Aðspurð hvort uppsagnirnar tengist þeim skorti segir Svanhvít að Heilsugæsla höfuðborgarsvæðisins sé rekin með halla eins og er en þessi endurskipulagning leiði ekki til þess að þjónusta við skjólstæðinga versni.

Aðspurð hvort frekari uppsagnir séu í pípunum segir Svanhvít að aðeins hafi legið fyrir ákvörðun um þessar uppsagnir en ekkert annað eins og er. „Við eins og aðrar stofnanir erum stöðugt að leita leiða til þess að sinna okkar hlutverki á sem hagkvæmastan hátt og halda uppi eins góðri þjónustu og mögulegt er," segir Svanhvít.