Ólöf Guðný: Heiðarleika borgarstjóra skal ekki draga í efa

Ólöf G. Valdimarsdóttir, aðstoðarmaður borgarstjóra, segir fulla einingu hafa verið á skrifstofu borgarstjóra um að ráða í stöðu framkvæmdastjóra miðborgarmála með þeim hætti sem gert var.

Þetta kemur fram í yfirlýsingu frá henni eftir að Ríkissjónvarpið greindi frá því í gær að skrifstofustjóri skrifstofu borgarstjóra hefði ráðlagt Ólafi F. Magnússyni borgarstjóra að auglýsa stöðuna. Mikil reiði hefur verið meðal borgarstarfsmanna vegna þeirra kjara sem Jakob Frímann Magnússon hefur verið ráðinn á en hann er með 861 þúsund krónur í laun fyrir starfið og setu í nefndum og ráðum í borginni.

Í tíufréttum Sjónvarps í gærkvöld kom enn fremur fram að skrifstofustjóri borgarstjóraskrifstofu hefði ekki komið að launaákvörðun og ráðningarsamningi við Jakob en ráðningin heyrði undir mannauðsstjóra. Þetta gengur þvert á orð borgarstjóra í bæði Íslandi í dag og Kastljósi í gær en þar sagði hann að ákvörðunin um ráðningu hefði verið tekin í samráði við bæði skrifstofustjórann og mannauðsstjórann.

Í tilkynningu aðstoðarmanns borgarstjóra segir enn fremur að hugmyndir um að ráða Jakob F. Magnússon tímabundið í starfið hafi fyrst og fremst verið vegna þess að hann var talinn vera mjög hæfur til að sinna starfinu. Launin séu í samræmi við það sem Miðborgarstjóri fékk áður fyrir sambærilegt starf. „Heiðarleika borgarstjóra í þessum efnum sem og öðrum skal ekki draga í efa og er óskað eindregið eftir að nú fáist vinnufriður svo hægt sé að sinna mikilvægum málefnum sem bíða úrlausna," segir Ólöf.