Fundu töluvert af fíkniefnum á tveimur stöðum í borginni

Lögregla á höfuðborgarsvæðinu lagði hald á fíkniefni á tveimur stöðum í borginni á föstudag í húsleitum sem miða að því að draga úr sölu og dreifingu fíkniefna.

Í íbúð í miðborginni var lagt hald á bæði amfetamín og hass, samtals um 200 grömm, auk tveggja kannabisplantna. Á sama stað fundust 150 þúsund krónur í peningum sem grunur leikur á að séu tilkomnir vegna fíkniefnasölu.

Þá lagði lögreglan sömuleiðis hald á amfetamín og hass í húsi í vesturbæ Reykjavíkur á föstudag en um minna magn var að ræða, eða rúmlega 30 grömm. Tveir karlar voru handteknir í tengslum við þessi mál en annar þeirra hefur játað sölu fíkniefna. Húsleitirnar voru framkvæmdar að undangengnum dómsúrskurði.