Ekkert því til fyrirstöðu að afgreiða frumvarp Valgerðar

Ekkert er því til fyrirstöðu að afgreiða frumvarp Valgerðar Bjarnadóttur um afnám eftirlaunalaganna sem setið hefur fast í allsherjarnefnd Alþingis síðan í haust, segja þingflokksformenn Framsóknarflokksins og Vinstri - grænna.

Viðbrögð stjórnarandstöðuflokkanna við yfirlýsingu Ingibjargar Sólrúnar Gísladóttur, formanns Samfylkingarinnar, um breytingar á eftirlaunaréttindum æðstu embættis- og ráðamanna ríkisins hafa verið blendin.

Ögmundur Jónasson, þingflokksformaður Vinstri - grænna, fullyrti í fréttum Stöðvar 2 í gær að tal um afnám lagannna væru blekking því af ummælum Ingibjargar að dæma standi einungis til að gera minni háttar breytingar á lögunum.

Valgerður Bjarnadóttir, varaþingmaður Samfylkingarinnar, lagði á haustdögum fram frumvarp um afnám eftirlaunalaganna en það hefur setið fast í allsherjarnefnd síðan þá. Ögmundur segir það benda til þess að ríkisstjórnin hyggist ekki afnema lögin.

Jón Magnússon hjá frjálslyndum fagnar frumkvæði Ingibjargar en Siv Friðleifsdótttir, þingflokksformaður Framsóknarflokksins, býst ekki við að frumvarp ríkisstjórnarinnar líti dagsins ljós á yfirstandandi þingi því augljóst sé að stjórnarflokkarnir séu ekki sammála um efni þess. Hún segir ekkert því til fyrirstöðu að afgreiða frumvarp Valgerðar.