Sjálfstæðisflokkurinn uppspretta sundurlyndis og ráðaleysis

Dagur B. Eggertsson, oddviti Samfylkingarinnar í borgarstjórn Reykjavíkur segist ekki geta verið annað en ánægður með niðurstöður könnunarinnar sem Gallup lét gera og greint var frá í kvöldfréttum RÚV. Í könnuninni er flokkur Dags nálægt því að ná hreinum meirihluta í borginni.

„Það blasir við að það heyrir sögunni til að Sjálfstæðisflokkurinn sé kjölfestan í borgarstjórn Reykjavíkur," segir Dagur í samtali við Vísi. „Í staðinn er flokkurinn uppspretta sundurlyndis og ráðleysis og vantar flokkinn augljóslega þá festu sem þarf til að stýra borginni."

Dagur segir könnunina fyrst og fremst endurspegla það flug sem hann segir 100 daga meirihlutann svokallaða hafa verið á. Hann bendir einnig á að könnunin hafi verið gerð fyrir liðlega mánuði síðan. „Ekki gleyma því að þetta var kannað áður en REI málið sprakk aftur, áður en Vatnsmýrarmálin fóru á flug og áður en vandræðin í kringum Fríkirkjuveg 11 litu komu upp á yfirborðið. Og ekki má gleyma vandræðunum í sambandi við ráðningu Jakobs F. Magnússonar."

Hann segist þess fullviss að ef svipuð könnun yrði gerð í dag myndi það skila sér í enn lakari útkomu fyrir Sjálfsæðismenn og betri útkomu fyrir hina flokkana sem skipuðu Tjarnarkvartettinn, „en þau hafa staðið sig gríðarlega vel að undanförnu."