Bubbi spáir byltingu

„Gera menn sér grein fyrir því að í fyrsta skipti í sögu þjóðarinnar liggur uppreisn í loftinu," segir Bubbi Morthens í grein í Morgunblaðinu í dag. Hann gagnrýnir stjórnvöld harkalega í greininni og spáir blóðugum mótmælum verði menn ekki dregnir til ábyrgðar fyrir það ástand sem nú ríkir í þjóðfélaginu.

Bubbi líkir stjórninni og samskiptum hennar við Davíð Oddson seðlabankastjóra við heimili alhólista, þar sem Geir kyssir höndina með vöndinn og Ingibjörg Sólrún lítur undan. „Heimilisfaðirinn er dauðadrukkinn en allir láta líta svo út að allt sé í stakasta lagi, þó svo að fólk utan veggja heimilisins sjái að maðurinn er ekki heill."

Bubbi biður guð að forða þjóðinni frá því að Davíð Oddson seðlabankastjóri snúi aftur í pólitík, en fer þeim mun fegurri orðum um Þorgerði Katrínu Gunnarsdóttur, sem hann segir vera framtíðarleiðtoga Sjálfstæðisflokksins.