Skýrslutökur í TR-máli

Skýrslutökur fara fram í Héraðsdómi Reykjavíkur í dag yfir sakborningum í fjársvikamáli tengdu Tryggingastofnun ríkisins.

Höfuðpaurinn í því máli er 45 ára kona, fyrrverandi starfsmaður TR, sem grunuð er um að hafa stolið 76 milljónum króna úr sjóðum stofnunarinnar og komið til vina og vandamanna. Alls voru 20 ákærðir vegna málsins en þáttur fimm manna hefur þegar verið gerður upp.

Þrítugur karlmaður fékk átta mánaða fangelsi og 52 ára kona var dæmd í sex mánaða skilorðsbundið fangelsi fyrir aðild sína að málinu. Maðurinn hafði milligöngu um að taka við og dreifa um níu milljónum króna sem hann fékk inn á bankareikning frá höfuðpaurnum en konan tók á móti um sjö milljónum króna inn á reikning sinn.

Þá var æskuvinkona höfuðpaursins dæmd í níu mánaða skilorðsbundið fangelsi fyrir aðild sína að málinu og nágrannakona konunnar var svo dæmd í fjögurra mánaða skilorðsbundið fangelsi. Enn fremur var fyrrverandi sambýlismaður og barnsfaðir höfuðpaursins dæmdur í tveggja mánaða skilorðsbundið fangelsi fyrir aðild sína að málinu.

Gert er ráð fyrir að skýrslutökum verði lokið í dag. Munnlegur málflutningur verjenda og sækjanda fer svo fram á morgun og að því loknu verðu málið lagt í dóm.