Bandarískur fræðimaður ræðir rykstorma og loftmengun

Rykstormar og loftmengun eru yrkisefni dr. Joseph M. Prospero frá Miami-háskóla sem flytur fyrirlestur í húsakynnum Landbúnaðarháskóla Íslands á Keldnaholti á morgun, þriðjudag, kl. 13.

Rykmengun getur valdið heilsutjóni en mikið ryk í andrúmslofti hefur jafnframt áhrif á loftslag jarðarinnar, segir í fréttatilkynningu. Dr. Prospero er virtur fræðimaður á þessu sviði og hefur meðal annars stundað rannsóknir á rykmengun í Vestmannaeyjum.

Í fyrirlestri sínum hyggst Prospero ræða um ryk yfir heimshöfunum og hvaðan rykmengunin berst. Þá mun hann fjalla um mikilvægi Íslands í þessu samhengi en töluvert magn af ryki berst frá auðnum landsins í þurrum sandstormum.