Próflaus á ofsahraða klyfjaður fíkniefnum

Lögreglan á Blönduósi stöðvaði í gær ökumann á suðurleið er leið átti um umdæmið. Var tilefni afskiptanna of hraður akstur en bifreiðin mældist á 112 kílómetra hraða í Víðidal. Við athugun kom í ljós að ökumaðurinn hafði verið sviptur réttindum til bifreiðaaksturs. Þótti lögreglumönnum í framhaldinu rétt að framkvæma athugun á ástandi ökumannsins. Hann reyndist þá undir áhrifum fíkniefna.

Ökumaðurinn var færður á lögreglustöð og leit framkvæmd í bifreiðinni. Við leitina fundust á annað hundrað grömm af amfetamíni og kókaíni. Viðurkenndi ökumaðurinn sölu og dreifingu fíkniefna síðastliðnar vikur. Honum var sleppt úr haldi eftir yfirheyrslu.

Við leit í bifreiðinni notuðu lögreglumenn fíkniefnaleitarhundinn Freyju sem hefur nýlega lokið starfsþjálfun hjá ríkislögreglustjóra. Að sögn lögreglu hefði hluti efnanna ekki fundist hefði dýrsins ekki notið við.