Segir ömurlegt að horfa upp á eyðileggingu

Framkvæmdastjóri Skógræktarfélags Reykjavíkur segir ömurlegt að horfa upp á þá eyðileggingu sem framkvæmdir á Hólmsheiði hafa haft í för með sér. Hann óttast frekari eyðileggingu á næstu árum og segir að græni trefillinn sé byrjaður að rakna upp.

Græni trefillinn nefnist það ræktunarbelti sem liggur við jaðar höfuðborgarsvæðisins og teygir sig frá Esjurótum alla leið til Hafnarfjarðar. Nokkuð hefur verið þrengt að þessu svæði á undanförnum árum eftir því sem byggðin hefur teygt sig austar.

Á Hólmsheiði er nú verið að ryðja burt þúsundum trjáplantna vegna vegaframkvæmda til að stytta vörubílum leið á losunarsvæði fyrir jarðvegsúrgang. Íbúar við svæðið hafa mótmælt þessum framkvæmdum sem og skógræktarmenn.

Samkvæmt deiliskipulagi á í framtíðinni að rísa atvinnusvæði á Hólmsheiði. Skógræktarmenn hafa mótmælt þessum áformum og verið í viðræðum við borgaryfirvöld vegna þeirra.