Ágúst Ólafur: Fáránlegt og barnalegt af Ögmundi

Ágúst Ólafur Ágústsson, varaformaður Samfylkingarinnar, segir að Ögmundur Jónasson þingmaður ætti að biðjast afsökunar á því að hafa birt á heimasíðu sinni mynd sem virðist sýna Guðlaug Þór Þórðarson taka í hönd Moammar Gaddafi, Lýbíuleiðtoga.

„Félagi okkar Ögmundur er kannski ekki þekktur fyrir að vera hófstilltur." sagði Ágúst í spjalli í Bítinu á Bylgunni í morgun. „Mér finnst þetta alveg fáránlegt að þingflokksformaður VG sé að fótósjoppa Gaddaffi einræðisherra með heilbrigðisráðherra. Það sýnir auðvitað hvers konar þrot hann er kominn í. Mér finnst þetta fyrir neðan allar hellur það sjá það allir."

Höskuldur Þórhallsson, þingmaður Framsóknarflokks var í sama þætti og þótt hann tæki ekki eins djúpt í árinni og Ágúst sagðist hann á þeirri skoðun að myndbirtingin eyðileggi fyrir þeim málstað sem Ögmundur er að berjast fyrir.

Ágúst bætti um betur og sagði að tiltæki á borð við þetta yrði ekki einu sinni liðið í menntaskóla. „Þetta er ofsalega barnalegt og fáránlegur dómgreindarbrestur sem hann (Ögmundur) er að sýna. Hann ætti auðvitað að biðjast afsökunar á þessu."

Þegar þáttastjórnendurnir höfðu samband við Ögmund sagði hann tilganginn að koma pólitískri list á framfæri, að verið væri að „fanga hið pólitíska augnablik á áhrifaríkan hátt," sagði Ögmundur og sagðist halda að „allir þeir sem hafi vott af húmor taki þessu vel og skilji hvað átt er við."

Ögmundur sagðist hafa viljað vekja athygli á þeirri „einkavæðingu heilbrigðiskerfisins" sem núverandi ríkisstjórn væri að ráðast í. Gaddafi væri í svipuðum hugleiðingum og því hefði honum þótt tilvalið að spyrða þá saman á mynd. Aðspurður hvort hann ætlaði sér að biðja Guðlaug Þór afsökunar sagði Ögmundur að ef einhverjir ættu að gera það þá væru það þeir sem „ætla að taka heilbrigðiskerfið og færa það út á markaðstorgið."