Áskilja sér allan rétt verði af Bitruvirkjun

Bæjarstjórn Hveragerðis samþykkti aukafundi í morgun harðorða bókun gegn Bitruvirkjun sem rísa á í nágrenni bæjarins. Þar áskilja forsvarsmenn bæjarins sér allan rétt til aðgerða verði af virkjuninni.

Orkuveita Reykjavíkur hyggst reisa Bitruvirkjun sem verður norðvestur af Hveragerði en á landi sem heyrir undir Sveitarfélagið Ölfus. Í dag rennur út frestur til þess að gera athugasemdir við auglýsta breytingu á aðalskipulagi Ölfuss sem meðal annars gerir ráð fyrir virkjuninni.

Verið að fórna meiri hagsmunum fyrir minni

Bæjarstjórn Hveragerðis kom saman til fundar í morgun vegna málsins þar sem fundargerð skipulagsnefndar bæjarfélagsins var samþykkt með sérstakri bókun sem snýr að Bitruvirkjun. Þar mótmælir bæjarstjórn Hveragerðisbæjar harðlega öllum áformum um virkjun við Bitru og telur einsýnt að með þeim áformum sé verið að fórna meiri hagsmunum fyrir minni. Er skorað á Sveitarfélagið Ölfus að hætta við þá breytingu á aðalskipulagi sveitarfélagsins sem gerir ráð fyrir virkjun á þessu svæði.

Aldís Hafsteinsdóttir, bæjarstjóri í Hveragerði, segir bæjarbúa hafa miklar áhyggjur af umhverfismengun og loftmengun. Hún bendir á að svæðið í kringum Bitruvirkjun sé eitt sérstæðasta útivistarsvæði sem Hvergerðingum og borgarbúum bjóðist og það sé til merkis um ótrúlega skammsýni ef það verði ofan á að reisa virkjun við Bitru. „Við höfum líka áhyggjur af útblæstrinum vegna nálægðar borholnanna. Á framkvæmdatímanum, sem er fjögur ár, munu 40 borholur blása til skiptis og loftmengunin berast yfir bæinn þar sem ríkjandi vindátt er yfir hann,"  segir Aldís.

Telur enn hægt að hætta við virkjunina

Athygli vekur í bókun bæjarstjórnar Hveragerðisbæjar að hún áskilur sér allan rétt í framhaldinu verði Bitruvirkjun að veruleika. Aðspurð hvort verið sé að hóta málshöfðun segist Aldís ekki vera með neinar yfirlýsingar um það. Komin hins vegar eitthvað upp sem skaði hagsmuni bæjarins áskilji forsvarsmenn hans sér rétt til aðgerða.

Aðspurð hvort ekki sé of seint að snúa málinu við núna segir Aldís ekki telja það. „Ég ætla ekki að trúa því. Við erum stórt sveitarfélag sem á ríka hagsmuni af því að þarna verði ekki framkvæmt," segir Aldís.

Þá er skotið fast á nágrannasveitarfélagið Ölfus. „Bæjarstjórn gerir verulegar athugasemdir við framgöngu Sveitarfélagsins Ölfuss í málinu. Ekki er ásættanlegt að sveitarfélag geti gengið fram með þeim hætti sem hér er gert og skipulagt starfsemi í túnfæti nágrannasveitarfélags sem getur haft mikil áhrif á framtíð og uppbyggingu þess," segir enn fremur í bókuninni.