Lést af völdum höfuðáverka við Skúlagötu

Bráðabirgðaniðurstöður krufningar hafa staðfest að maðurinn sem fannst látinn í íbúð sinni við Skúlagötu í fyrrakvöld lést af völdum höfuðáverka. Þetta staðfestir Friðrik Smári Björgvinsson, yfirlögregluþjónn hjá lögreglunni á höfuðborgarsvæðinu, við Vísi.

Tveir menn voru í gær úrskurðaðir í gæsluvarðhald til 8. september vegna málsins og voru þeir yfirheyrðir í gær. Að sögn Friðriks beinist rannsókn lögreglunnar að því hvernig maðurinn hlaut höfuðáverkana. Hann reiknar með að mennirnir tveir sem sitja í haldi verði aftur yfirheyrðir á morgun.

Annar mannanna sem er í haldi var sá sem hafði samband við lögreglu vegna hins látna en ekki reyndist unnt að yfirheyra hann strax vegna annarlegs ástands. Hinn maðurinn var handtekinn í gærmorgun.