8.700 störfuðu við fjármálaþjónustu í fyrra

Liðlega 8.700 manns störfuðu við fjármálaþjónustu í fyrra og hafði þeim fjölgað um 2.100 frá árinu 2005.

Þetta kemur fram í bókinni Landshagir 2008, nýrri hagtöluárbók Hagstofunnar. Búast má við að þessi tala lækki nokkuð í ár og á næsta ári í ljósi bankahrunsins hér á landi.

Þá sýna tölurnar í árbókinni að ráðstöfunartekjur á mann hækkuðu um tæpan þriðung frá árinu 2002 til ársins 2007. Í tölunum má einnig sjá að hagvöxtur árið 2007 var 4,9 prósent og tekjur ríkissjóðs árið 2007 sem hlutfall af vergri landsframleiðslu voru 35,2 prósent en gjöld 31,2 prósent.