Bókatíðindi væntanleg

Bókatíðindi ársins 2008 eru nú í prentun, á áætlun og líður því að því að þau verði borin út á öll heimili. Fyrirfram hafði verið búist við fækkun titla. Niðurstaðan er að um 40 færri titlar eru í Bókatíðindum í ár en árið 2007, eða 759 alls. Þetta eru því önnur stærstu Bókatíðindi til þessa. Árið 2006 var fjöldi titla 677. Árið 1998 voru þeir 418. Fækkunin er mest í flokknum Þýddar barnabækur, en þar virðist sem erlent samprent verði fyrir barðinu á erfiðleikum við eðlileg viðskipti við útlönd.

„Fregnir berast af því að bækur séu stopp á hafnarbökkum Austurlanda fjær,“ segir Kristján B. Jónasson formaður Félags bókaútgefenda sem stendur fyrir útgáfunni. Athygli vekur að sumir flokkar vaxa. Í ár eru skráðir 53 titlar í ljóðaflokknum en voru 45 í fyrra, voru 28 árið 1998 (sem var annars gott ár í bókaútgáfu). Einnig handbækur, þær eru 59 í ár en voru 53 í fyrra, 33 árið 1998. Þýdd skáldverk eru líka fleiri og þar kemur kiljuútgáfan sterk inn, í ár eru 84 titlar en voru 79 í fyrra, voru 66 árið 2006 og 71 árið 2005, 44 árið 1998. Með öðrum orðum: Aldrei hafa jafn margar þýðingar á erlendum skálverkum verið skráðar til leiks í Bókatíðindum og nú, en jafnan eru allflestar slíkar þýðingar skráðar í Bókatíðindi.

Fækkun í öðrum flokkum er lítil svo munar 2-5 titlum og er ekki mikil m.v. t.d. árin 2006 og 2005. Frumsamdar barnabækur eru 76 í ár, voru 51 árið 2006 og 39 árið 2005, 49 árið 1998. Frumsamin ísl. skáldverk eru nú 72, voru 79 í fyrra, 63 árið 2006 og 67 árið 2005, 49 árið 1998. Ævisögur eru 40 í ár, voru 44 í fyrra, 33 árið 2006 og 36 árið 2005, 24 árið 1998. Einn stærsti flokkurinn er Fræði og bækur almenns efnis. Hann er nánast jafn stór og í fyrra, var þá 204 en er nú 202, sem er rosafjölgun frá 2006 (156) og 2005 (162) og 124 árið 1998.

Mjög stór hluti þýðinganna er nú þegar kominn út sem og mikið af fræðibókunum. Hitt fer allt inn á jólamarkaðinn.

Það verður mikið úrval af bókum þessi jólin. Enginn þarf að kvíða vöruskorti þar.

Aldrei hafa komið út jafn margar ljóðabækur. Ævisögur, skáldverk, ísl. barnabækur og fræði eru í sögulegum hápunkti.