Mosfellsbær tekur við rekstri íþróttamiðstöðvar

Mosfellsbær hefur tekið við rekstri Íþróttamiðstöðvarinnar Lágafells við Lækjarhlíð í Mosfellsbæ sem áður var rekin á vegum fyrirtækis í eigu Nýsis hf.

Öllum starfsmönnum íþróttamiðstöðvarinnar verður boðið starf hjá Mosfellsbæ frá og með 1. nóvember. Alls starfa 13 manns í fullu starfi við íþróttamiðstöðina og um tíu til viðbótar í hlutastarfi.

Fasteignafélagið Lækjarhlíð ehf., sem er í eigu Nýsis hf. og Mosfellsbæjar, reisti íþróttamiðstöðina árið 2006 og hefur Nýsir Services rekið hana upp frá því. Í starfseminni felst meðal annars þjónusta við nemendur í Lágafellsskóla, svo sem sundkennsla og íþróttakennsla og er þar jafnframt almenningssundlaug fyrir íbúa Mosfellsbæjar, samkvæmt samningi Nýsir Sevices og Mosfellsbæjar.

Vegna mikilla erfiðleika í efnahagslífinu og rekstrarörðugleika fyrirtækisins óskaði Nýsir Services nýverið eftir því við Mosfellsbæ að það yrði leyst undan samningum. Mosfellsbær varð við þeirri ósk og tekur við rekstri íþróttamiðstöðvarinnar svo tryggja megi áframhaldandi þjónustu við íbúa í Mosfellsbæ.

Í íþróttamiðstöðinni er meðal annars rekin sundlaug, íþróttahús og líkamsræktarstöð á vegum World Class.

„Það er ánægjuefni að Mosfellsbær geti boðið starfsfólki Íþróttamiðstöðvarinnar Lágafells áframhaldandi trygga atvinnu og brýnt að tryggja áframhaldandi þjónustu við íbúa Mosfellsbæjar með því að bregðast við ósk rekstraraðilans um að taka við rekstrinum. Við vonumst til að geta tekið við rekstrinum án þess að nokkuð rask verði á starfseminni," segir Haraldur Sverrisson, bæjarstjóri Mosfellsbæjar.

Haraldur Líndal, framkvæmdastjóri Nýsir Services, segir: "Ég þakka Mosfellingum fyrir ánægjulegt samstarf á liðnum árum og bæjarstjórn Mosfellsbæjar fyrir sýndan skilning á stöðu fyrirtækisins."