Vafamál hvort varamaður Framsóknar í borgarráði megi sitja þar

Vafamál er að varafulltrúi Framsóknarflokksins sé kjörgengur til borgarráðs eftir því sem fram kemur í svari skrifstofustjóra borgarstjórnar.

Svarið var lagt fram í borgarráði í dag og samkvæmt bókun sem fulltrúar Samfylkingarinnar og Vinstri - grænna lögðu fram kemur þar einnig fram að skrifstofustjórinn telji óljóst hvort gerð séu strangari kjörgengisskilyrði í borgarráði en í aðrar nefndir og ráð borgarinnar. Telur skrifstofustjórinn að skýrar þurfi að kveða upp úr með þau í samþykktum. Jafnframt telur hann að færa megi rök að því að varamaður í borgarráði þurfi að minnsta kosti að vera varaborgarfulltrúi.

Varamaður Óskars Bergssonar, formanns borgarráðs og fulltrúa Framsóknarflokksins í ráðinu er Guðlaugur G. Sverrisson, sem einnig er formaður stjórnar Orkuveitunnar. Hann sat sinn fyrsta borgarráðsfundi í morgun. Guðlaugur skipaði 14. sæti á framboðslista Framsóknarflokksins í síðustu borgarstjórnarkosningum.

Í bókun Samfylkingar og Vinstri - grænna segir að borgarráð sé framkvæmdastjórn Reykjavíkurborgar þar sem haldnir sé fundir vikulega um meginmál í rekstri og stefnumótun borgarinnar.

„Þar eiga samkvæmt sveitarstjórnarlögum sæti kjörnir fulltrúar enda brýnt að þeir sem þar sitja hafi ríkt umboð frá kjósendum og almenningi. Það er sannarlega ekki til þess fallið að auka virðingu borgarstjórnar að meirihlutinn láti það óátalið að umræddur varamaður sitji við borð framkvæmdastjórnar borgarinnar þrátt fyrir fyrirliggjandi efasemdir," segir enn fremur í bókuninni.