Óskar áhyggjulaus yfir setu Guðlaugs í borgarráði

Óskar Bergsson borgarfulltrúi Framsóknarflokksins segist engar áhyggjur hafa af vangaveltum um hvort varamaður hans í borgarráði, Guðlaugur Sverrisson, megi sitja í ráðinu. Á borgarráðsfundi í morgun var lagt fram álit skrifstofustjóra borgarstjórnar þar sem kemur fram að reglur í varðandi gjaldgengi varamanna í borgarráði séu óljósar. Guðlaugur var á lista framsóknarmanna fyrir síðustu kosningar en hann er hins vegar ekki varamaður Óskars Bergssonar. Málinu hefur verið vísað til forsætisnefndar og segist Óskar þess fullviss að málið verði til lykta leitt þar.

„Mér finnst það nú full glannaleg túlkun á umsögn skrifstofustjóra borgarstjórnar að það sé einhver vafi, þegar hann talar um að það sé kannski ekki nógu skýrt," segir Óskar Bergsson í samtali við Vísi. „Við vísuðum málinu til forsætisnefndar og munum taka málið fyrir og klára það þar." Aðspurður hvort ekki þurfi að skerpa á þessum reglum segir Óskar: „Miðað við umræðuna í borgarráði í dag virtist minnihlutinn líta á þetta sem eitt af stóru málunum og þá er bara sjálfsagt að hafa það þannig og útkljá málið sem fyrst."

Óskar segir að áður en hann hafi valið Guðlaug sem varamann sinn í borgarráði hafi hann kannað málið hjá lögmönnum borgarinnar. „Það var öllum ljóst að flokkurinn minn var talsvert mikið laskaður í öllum sætum í kringum mig og ég þurfti því að grípa til annara ráða. Þetta var niðurstaðan."

Hann bendir á að í umsögn skrifstofustjóra komi fram að lögin kveði hvergi skýrt á um að þetta fyrirkomulag sé í lagi, „en það er heldur ekkert sem segir að þetta megi ekki. Sumir stjórnmálamenn vilja að allt sé bannað sem ekki er leyft og svo eru aðrir sem vilja að allt sé leyft sem ekki er bannað. Þetta er spurning um hvernig menn vilja nálgast hlutina," segir Óskar.

Ólafur Kr. Hjörleifsson, skrifstofustjóri borgarstjórnar, segir í áliti sínu að skýrar þurfi að kveða á um þetta atriði í samþykktum borgarinnar. Hann bendir á í samtali við Vísi að málinu hafi verið vísað til forsætisnefndar borgarinnar til umfjöllunar. Ef hún leggi fram tillögu um breytingar á samþykktum borgarinnar endi tillagan á borði borgarstjórnar sem þurfi að samþykkja hana. Það kemur svo í hlut ráðherra sveitarstjórnarmála, samgönguráðherra, að staðfesta breytingarnar.

Aðspurður hvort Óskar hafi ráðfært sig við hann áður en Guðlaugur var skipaður segir Ólafur að hann tjái sig ekki um einstök samtöl við borgarfulltrúa.