Barnaníðingur vill í Biblíuskóla

Barnaníðingurinn Ágúst Magnússon mun fá reynslulausn frá Litla-Hrauni á föstudaginn. Ágúst á eitt ár eftir af dómi sínum en reynslulausnina fær hann þó ekki nema með ákveðnum skilyrðum.

Ágúst sem er hvað þekktastur fyrir að hafa gengið í gildru hjá fréttaskýringarþættinum Kompáss hefur afplánað dóm á Litla-Hrauni síðan 2004. Þegar hann gekk í gildru Kompáss afplánaði hann á áfangaheimilinu Vernd og hafði aðgang að tölvu með nettengingu.

Í kjölfar þess máls tók Vernd þá ákvörðun að vista ekki kynferðisglæpamenn sem brotið hafa gegn börnum en Ágúst var árið 2004 dæmdur fyrir að níðast á sex drengjum.

Ágúst starfaði mikið fyrir KFUM á árum áður og er þar af leiðandi kallaður Gústi guðsmaður af samföngum sínum á Litla-Hrauni. Heimildir Vísis þaðan herma að Ágúst hafi viðrað hugmyndir um að fara í Biblíuskóla erlendis að afplánun lokinni.

Þó Ágúst þurfi að uppfylla ákveðin skilyrði sem snúa að tilkynningarskyldu á reynslutíma þá þykir líklegt að hann megi fara úr landi á reynslulausninni. Þar sem Ágúst fær ekki inn á Vernd er óljóst hvar hann mun koma til með að búa þegar hann losnar.

Í lögum um reynslulausn nr. 49 frá árinu 2005 eru skilyrði sem Fangelsismálastofnun getur sett í tilfelli sem þessu. Þar kemur m.a fram að aðili sé háður umsjón og eftirliti Fangelsismálastofnunar eða annars aðila sem hún ákveður. Ekki má hann neyta áfengis eða ávana- og fíkniefna.

Einnig kemur fram að aðili hlíti fyrirmælum umsjónaraðila um dvalarstað, menntun, vinnu, umgengni við aðra menn og iðkun tómstundarstarfa.

Samkvæmt heimildum Vísis þarf Ágúst að uppfylla þessi skilyrði. Hann má meðal annars ekki fara þar sem börn eru að tómstundum. T.d má hann ekki sækja sundlaugar á meðan skólasundi stendur og verður hann að tilkynna sig til stofnunarinnar reglulega. Þessum skilyrðum mun Ágúst vera háður næstu tvö árin.