Ekki rétt að Moody´s telji best að bankarnir fari úr landi

Geir H. Haarde forsætisráðherra segir það rangt sem fram hafi komið í fjölmiðlum að matsfyrirtækið Moody´s hafi lagt til að íslenku bankarnir flyttu úr landi. Þetta kom fram í fyrirspurnartíma á Alþingi í dag.

Flokksbróðir forsætisráðherra, Illugi Gunnarsson, gerði nýja skýrslu Moody´s á lánshæfi ríkissjóðs að umræðuefni í fyrirspurn sinni. Benti hann að Moody´s hefði komist að því að staða ríkissjóðs væri gríðarlega sterk og hann væri vel í stakk búinn til að takast á við kreppu á fjármálamarkaði. Það væri meðal annars vegna þess hve háar tekjur væru á mann hér á landi og hve staða lífeyrissjóðanna væri góð.

Spurði hann forsætisráðherra hins vegar út í það sem lesa mætti út úr skýrslu Moody´s um að íslenska krónan væri of lítil fyrir bankana og að betra væri fyrir bankana að fara úr landi.

Geir H. Haarde sagði álit Moody´s jákvættt, ekki síst varðandi fjárhagsstöðu ríkissjóðs. Matsfyrirtækið birti núna þetta álit til þess að rökstyðja það að það hafi gefið ríkissjóði hæstu einkunn, Aaa.

Þá sagði Geir rétt að leiðrétta það sem fram hefði komið í fjölmiðlum að best væri að íslensku bankarnir flyttu úr landi. Það standi ekki í skýrslunni heldur hins vegar að ef bankarnir fari úr landi muni þau óbeinu áhrif sem hvíli á ríkissjóði vegna þeirra minnka. Þetta sé hins vegar ekki aðalatriði skýrslunnar heldur það að efnahagsaðstæður séu þannig að engin hætta sér hérlendis þótt það kæmi til alvarlegrar fjármálakreppu.