Bauhaus segir upp starfsmönnum sínum

Flestum þeim starfsmönnum sem Bauhaus hafði ráðið til að undirbúa opnun verslunar undir Úlfarsfelli hefur verið sagt upp störfum. Halldór Óskar Sigurðsson, framkvæmdastjóri Bauhaus á Íslandi, sagðist í samtali við Vísi ekki vilja nefna nákvæmlega tölu varðandi það hversu mörgum hefði verið sagt upp en sagði að þeir hlypu á tugum. Um væri að ræða sölustjóra, deildarstjóra og fleira.

Halldór benti þó á að verið væri að athuga hvort hluti af þessum starfsmönnum fengi vinnu hjá Bauhaus í Danmörku. Halldór þverneitar því að Bauhaus sé hætt við að hefja starfsemi á Íslandi. Hins vegar hefði málið verið sett á ís á meðan efnahagsástandið væri í núverandi mynd.