Ekki á móti því að skoða alla fleti eftirlaunalaga

Ögmundur Jónasson, þingflokksformaður Vinstri - grænna, gerði hin umdeildu lög að umtalsefni í óundibúnum fyrirspurnum á Alþingi í morgun. Sagði hann lögin sett í óþökk þjóðarinnar og minnti hann á eindregna yfirlýsingu Ingibjargar Sólrúnar Gísladóttir, formanns Samfylkinarinnar, um að Samfylkingin myndi beita sér fyrir breytingu laganna.

Ögmundur sagðist hafa fagnað frumvarpi Valgerðar Bjarnadóttur, varaþingmanns Samfylkingarinnar, sem lagt hefði verið fram í haust en meðflutningsmenn hennar kæmu úr Samfylkingunni. Spurði Ögmundur hvort Samfylkingin myndi styðja frumvarp Valgerðar sem kvæði á um afnám laganna.

Ingibjörg Sólrún Gísladóttir utanríkisráðherra minnti á að allir flokkar hefðu komið að frumvarpinu en þegar atkvæði hefðu verið greidd um það hefðu þingmenn Vinstri - grænna og flestir þingmenn Samfylkingarinnar ekki stutt það. Hún sagðist hafa lýst því yfir að hún myndi beita sér fyrir breytingum á lögunum og kveðið væri á um breytingar í stjórnarsáttmála. Unnið væri að málinu innan ríkisstjórnarinnar. Um frumvarp Valgerðar sagði utanríkisráðherra að það kvæði ekki á um afnám laganna heldur breytingar. Hún teldi mikilvægt að ná samstöðu um málið á þingi.

Vinna sér mun hraðar inn eftirlaunaréttindi

Ögmundur kom þá aftur í pontu og sagði ræðu utanríkisráðherra einhverja þá döprustu sem hann hefði heyrt á þingi. Minnti hann á að í frumvarpi Valgerðar væri gert ráð fyrir breytingum á ákvæðum eftirlaunalaganna sem snertu ávinnslu eftirlaunaréttinda. Ráðherrar áynnu sér sex prósent réttindi á ári, þingmenn þrjú prósent en almennir launamenn um tvö prósent. Krafðist hann þess að frumvarp Valgerðar yrði tekið til umræðu.

Ingibjörg Sólrún sagði þá að eftirlaunalögin væru meingölluð og full ástæða væri til að skoða þau og ná samkomulagi um að breyta þeim. Verið væri að fara yfir lögin og hún teldi koma til greina að breyta ávinnsluákvæðunum, ákvæðum um tvöföld laun og sömuleiðis að breyta eftirlaunaaldrinum. Hún vildi einnig skoða hvort breytingarnar næðu til þeirra sem nú þegar tækju tvöföld laun samkvæmt kerfinu. Ekki væri tekið á öllu þessu í frumvarpi Valgerðar.