„Þegiðu nú, Guðni“

Steingrímur J. Sigfússon, formaður Vinstri - grænna, sagði samstarfsfélaga sínum úr stjórnarandstöðu, Guðna Ágústssyni, formanni Framsóknarflokksins, að þegja við umræður um orku- og stóriðjumál á Alþingi í dag.

Steingrímur var að gagnrýna stefnu ríkisstjórnarinnar í málaflokknum þegar Guðni kallaði fram í fyrir honum. Ekki heyrðist vel hvað Guðni sagði en Steingrímur svaraði af bragði: „Þegiðu nú, Guðni," og bætti við að í lagi væri að kalla fram í fyrir mönnum á þingi ef vit væri í því sem sagt væri.

Eftir ræðuna tók Sturla Böðvarsson, forseti Alþingis, stutt til máls og bað menn að gæta hófs í frammíköllum og orðavali. Menn yrðu að gæta sín hvernig þeir beittu orðsins brandi.