Metaðsókn að skíðasvæðum landsins

Um 170 þúsund manns sóttu skíðasvæðin á Íslandi á liðnum vetri og er það mesta aðsókn síðan talningar hófust. Þetta kemur fram í tilkynningu frá skíðasvæðunum en forsvarsmenn þeirra héldu ársfund sinn fyrir helgi á skíðsvæðinu í Oddskarði.

Fyrstu skíðasvæðin voru opnuð í byrjun desember og þeim síðustu lokað núna um hvítasunnuna. Mest var aðsóknin í Bláfjöllum í vetur, eða um 60 þúsund manns, og í Hlíðarfjall á Akureyri voru gestirnir um 50 þúsund. Í fyrsta skipti í mörg ár voru öll skíðsvæðin á landinu opin á sama tíma og aðsókn jókst hjá þeim öllum.

Þá var sala á skíða- og snjóbrettabúnaði með besta móti í vetur og varð margvíslegur búnaður sem er til sölu í skíðavöruverslunum uppseldur um miðjan vetur. Sérstaklega var tekið eftir aukningu á notkun skíðahjálma.