Fjölbreytilegri samgöngur til að bæta lýðheilsu

Auka þarf fjölbreytileika í samgöngum og þétta byggð til þess að bæta lýðheilsu í höfuðborginni að mati formanns skipulagsráðs Reykjavíkurborgar. Mengun af völdum umferðar er þegar byrjuð að hafa veruleg áhrif á heilsu ungra barna.

Fjallað var um tengsl lýðheilsu og borgarskipulags á málþingi sem Lýðheilsufélagið stóð fyrir í Iðnó í morgun. Á fundinum kom meðal annars fram að aukin áhersla á einkabílinn í borgarskipulagi hafi haft þau áhrif að fólk hreyfi sig minna sem síðan stuðlar að verri lýðheilsu. Auka þurfi fjölbreytileika í samgöngum og þétta byggð til að snúa þessari þróun við.

„Svo held ég að það sé verkefni sem við þurfum að hugleiða sérstaklega, hvernig nýtum við opnu rýmin okkar betur. Hvernig gefum við fólki aukin tækifæri til útivistar og það að nýta þessi sameiginlegu rými sem við eigum. Síðan er það ákveðin gæði og fegurð í umhverfinu sem skiptir máli," segir Hanna Birna Kristjánsdóttir, formaður skipulagsráðs borgarinnar.

Hanna Birna segir nauðsynlegt að þétta byggð og horfir meðal annars til Vatnsmýrarinnar í þeim efnum. „Ég held að í framtíðinni fari flugvöllurinn. Núna erum við þegar byrjuð að skipuleggja jaðarsvæðin í kringum völlinn til þess að nýta þetta svæði betur fyrir fólk."

Dagur B. Eggertsson borgarfulltrúi segir mengum af völdum bílaumferðar vera vandamál. „Við þurfum að glíma við sömu vandamál og aðrar borgir í heiminum og sumt hjá okkur er verra en þar. Til dæmis er ýmislegt sem bendir til þess að umferð sé farin að hafa veruleg áhrif á heilsu ungra barna," segir Dagur og bendir einnig á að erlendar rannsóknir sýni að tengsl séu á milli svifryksmengurnar og tíðni hjartaáfalla.

Aðspurður hvort hann telji að flugvöllurinn þurfi að víkja til þess að líðan borgarbúa verði betri segir Dagur: „Það mundi sannanlega skila ákveðnum áfanga en það er ekki nóg. Við þurfum líka huga að heilsunni í öllum hverfum."