Segir forseta borgarstjórnar í fullkominni afneitun

Össur Skarphéðinsson iðnaðarráðherra segir Hönnu Birnu Kristjánsdóttur, forseta borgarstjórnar, í fullkominni afneitun þegar hún segi allt sé í stakasta lagi hjá meirihlutanum í borginni.

Í pistli á heimasíðu sinni leggur Össur út af viðtali sem Sigmundur Ernir Rúnarsson átti við Hönnu Birnu í þættinum Mannamáli á Stöð 2 í gærkvöld. Össur segir vandamál Sjálfstæðisflokksins í borgarstjórn hafa kristallast vel í viðtalinu en eins og fram hefur komið mælist fylgi við flokkinn í borginni í kringum 30 prósent nú.

„Forseti borgarstjórnar taldi greinilega ekki að það væri nokkuð aðfinnsluvert við framgöngu sinna manna. Hanna Birna átti varla nógu sterk lýsingarorð til að lýsa því hversu yfirmáta stolt hún væri af verkum sínum og borgarstjórnarflokksins. Hún var stolt af eindrægninni innan flokksins, stolt af samstöðunni innan hópsins, og hún lagði sérstaka lykkju á leið sína í viðtalinu til að taka það fram hversu sérstaklega ánægð hún væri með Ólafs F. Magnússon sem borgarstjóra.

Nánast sjálfgefið Vilhjálmur taki við sem borgarstjóri

Össur segir enn fremur að helstu tíðindin úr þættinum hafi verið þáu að það virðist nánast sjálfgefið af hálfu Hönnu Birnu að Vilhjálmur Þ. Vilhjálmsson taki við borgarstjórastólnum á næsta ári. „Hanna Birna tvítók að hann væri númer eitt á listanm og hefði þar að auki staðið sig afburða vel áður en meirihlutinn slitnaði á sínum tíma," segir Össur enn fremur og bætir við: „Skýring hennar á því afhverju meirihlutinn sprakk á sínum tíma var álíka veruleikatengd. Slitin voru eingöngu ódáminum Birni Inga Hrafnssyni að kenna, en fráleitt að þau hefðu haft eitthvað með sundurlyndi og pólitíska valdagræðgi innan borgarstjórnarflokks íhaldsins að gera."

Össur segir enn fremur að út frá orðum Hönnu Birnu megi lesa að allt sé í stakasta lagi og að hún hafi nánast verið grátbólgin yfir afrekum meirihlutans. „Á fræðimáli heitir þetta sennilega að vera í fullkominni afneitun," segir Össur.