Geir: Stjórnarandstaðan hefur ekkert til málanna að leggja

Stjórnarandstaðan sýndi á yfirstandandi septemberþingi að hún hefur ekkert til málanna að leggja í efnahagsmálum, að mati Geirs H. Haarde forsætisráðherra. Sókn stjórnarandstöðunnar hafi leysts upp í innri átök og endað með glæsilegu sjálfsmarki. Heimir Már Pétursson var að koma af fundi forsætisráðherra með Sjálfstæðismönnum í Valhöll.

Fjölmennt var á fundi Geirs H. Haarde forsætisráðherrra og formanns Sjálfstæðisflokksins með flokksmönnum í Valhöll í morgun. Geir sagði að margir hafi spáð því að hart yrði sótt að ríkisstjórninni á nýafstöðnu septemberþingi vegna stöðu efnahagsmála.

Geir sagði bábyljur og upphrópanir Guðna Ágústssonar formanns Framsóknarflokksins og Steingríms J. Sigfússonar um aðgerðarleysi ríkisstjórnarinnar hafi verið afhjúpaðar á haustþinginu.

Forsætisráðherra sagði að þrátt fyrir alþjóðlega efnahagslægð og lánsfjárkreppu stæðu Íslendingar betur að vígi en flestar þjóðir og með meiri gjaldeyrisforða eftir síðustu aðgerðir ríkisstjórnarinnar en flest önnur ríki.