Vill að lögreglan kanni stuld á bókhaldsgögnum forsetans

„Forsetinn á þessa stundina við að glíma hnitmiðað áhlaup óvildarmanna, sem á tímum þegar forbyltingin hefur lækkað alla siðræna standarda, virðast hafa komist yfir stolin gögn úr stjórnsýslunni um bókhald þeirra hjóna. Afhverju skoðar lögreglan ekki hver stal bókhaldsgögnum forsetans?" segir Össur Skarphéðinsson iðnaðarráðherra í nýjustu færslu á vef sínum. „Samkvæmt því áhugaleysi virðist yfirmanni löggæslu finnast í góðu lagi þó farið sé inn í opinber skjöl sem ég hefði haldið að þyrfti sérstakan bókhaldslykil til að komast í. Kannski ríkislögreglustjóri sé farinn að virða upplýsingalögin á sinn hátt," bætir ráðherrann við.

Össur nefnir ekki sérstaklega hvaða bókhaldsgögn hann eigi við, en Fréttastofa Stöðvar 2 og Vísis birti fyrr í mánuðinum upplýsingar um símakostnað forsetaembættisins. Agnes Bragadóttir vakti máls á þessum fréttaflutningi í grein í sunnudagsblaði Morgunblaðsins. Þar furðar hún sig á óráðsíu við rekstur forsetaembættisins.

Össur segir hins vegar að forsetinn hafi varist vel, og auðveldlega snúið vörn í sókn. Hann hafi bent á að síðastliðin fimmtán ár hafi engum starfsmanni verið bætt við forsetaembættið, þó umsvifin hafi stórlega aukist.