RÚV braut ekki siðareglur með umfjölllun um Guðmund

Siðanefnd Blaðamannafélagsins hefur komist að þeirri niðurstöðu að fréttamaður Ríkisútvarpsins hafi ekki brotið siðareglur í umfjöllun sinni um samskipti Guðmundar Þóroddssonar, fyrrverandi forstjóra Orkuveitu Reykjavíkur, og fyrirtækisins.

Greint var frá því í fréttum Sjónvarps í sumar að Orkuveita Reykjavíkur krefðist þess að Guðmundur Þóroddsson, fyrrverandi forstjóri OR, skilaði gögnum, bifreið, farsíma og tölvu sem voru í vörslu hans. Var málið kynnt með orðunum: Neitar að skila trúnaðargögnum.

Guðmundur sendi fjölmiðlum yfirlýsingu daginn eftir þar sem hann sagðist ekki hafa tekið nein skjöl úr skjalageymslu Orkuveitunnar eins og haldið hefði verið fram í fréttinni. Þrátt fyrir þetta hefði Sjónvarpið ekki sé ástæðu til að leiðrétta fréttina frá kvöldinu áður. Guðmundur fór í framhaldinu fram á það að fréttastofa Sjónvarps drægi frétt sína til baka og bæðist afsökunar á aðdróttunum sem í henni fælist. Við þessu varð fréttastofan ekki og því leitaði Guðmundur til siðanefndarinnar.

Siðanefndin bendir á að daginn eftir að fréttin var flutt hafi önnur frétt verið sögð af málinu þar sem vitnað hefði verið til yfirlýsingar Guðmundar og samtals við hann þar sem hann lýsir furðu sinni á umræddum fréttaflutningi og kveðst ekki hafa tekið gögn úr skjalageymslu Orkuveitunnar.

Benti siðanefnd á að fréttastofa Sjónvarps teldi sig hafa traustar heimildir fyrir málinu og að með því að greina frá atriðum í yfirlýsingu Guðmundar Þóroddssonar hefði ónákvæmt orðalag verið leiðrétt enda þótt orðið leiðrétting hefði ekki verið notað né hann beðinn afsökunar.