Frændi sýknaður af kynferðislegri misnotkun

Karlmaður var sýknaður í Héraðsdómi Austurlands í dag en hann var ákærður fyrir að hafa káfað á kynfærum stúlku sem þá var 7-8 ára gömul. Maðurinn er frændi stúlkunnar og sagðist faðir hennar hafa komið að honum að nudda kynfæri hennar.

Í dómnum segir að upphaf málsins hafi hafist með bréfi frá því í nóvember árið 2007 þegar félagsmálayfirvöld í Fljótsdalshéraði sendi rannsóknardeild lögreglunnar á Eskifirði bréf þar sem óskað var eftir rannsókn á meintu kynferðisbroti gagnvart barninu.

Þar kemur fram að ráðgjafi hafi í október sama ár átt viðtal við foreldra stúlkunnar sem skýrðu frá því að dóttirin hefði verið að taka þátt í kynferðislegum leikjum með örðum stúlkum.

Hafi faðir stúlkunnar þá greint frá því að að hann hefði einu sinni komið að henni þegar hún var um 7-8 ára gömul með frænda sínum þar sem hann hafi verið að nudda kynfæri hennar. Sagði faðirinn að eftir það hefði hann reynt að sjá til þess að stúlkan væri ekki ein með frændanum en ekki hafi verið leitað til barnaverndaryfirvalda vegna málsins.

Stúlkan krafðist miskabóta upp á 500.000 krónur. Í dómnum er m.a tekið tillit til þess að faðir stúlkunnar hafi sagst hafa séð ákærða með höndina í klofi stúlkunnar en kvaðst þó ekki hafa séð nákvæmlega hvar eða hvort hann var með höndina innan eða utan klæða. Framburður vitnisins var því ekki talinn ljós að þessu leyti.

Í niðurstöðum dómsins er sagt að þrátt fyrir að brotaþoli beri ýmis einkenni kynferðislegrar misnotkunar þyki með vísan til ósamræmis í framburði stúlkunnar og annara vitna, ekki talið sannað, svo hafið sé yfir skynsamlegan vafa, að ákærði hafi gerst sekur um háttsemi þá sem greini í ákæru. Ber því að sýkna ákærða af refsikröfu ákæruvalds í þessu máli.

Dóm Héraðsdóms Austurlands má lesa í heild sinni hér.