Undirskriftasöfnun um nýtingu orkuauðlinda

Hafin er undirskriftasöfnun á vegum áhugafólks um nýtingu orkuauðlindir þjóðarinnar þar sem skorað er á kjörna fulltrúa á Alþingi og sveitarstjórnum að standa vörð um lífskjör landsmanna og skynsamlega nýtingu orkuauðlinda.

,,Nýting auðlindanna er lykillinn að áframhaldandi velsæld, leiðin að fjölbreyttara atvinnulífi og framtíðarstoð öflugs efnahags," segir í tilkynningu frá Áhugamönnum um nýtingu orkuauðlinda.

Heimasíða átaksins verður opin næstu tvær til þrjár vikur og að því loknu verður Geir H. Haarde, forsætisráðherra, og Halldóri Halldórssyni, formanni Sambands íslenskra sveitafélaga, afhent áskorunin.

,,Það er okkar von að þetta átak verði til þess að auka heilbrigða umræðu um nýtingu orkulinda og mikilvægi orkunnar fyrir Ísland á innlendri og erlendri grundu," segir í tilkynningunni.

Undirskriftasöfnunin fer fram á vefsíðunni undirskrift.is.