Vonbrigði að nýr meirihluti vilji Bitruvirkjun

Aldís Hafsteinsdóttir, bæjarstjóri í Hveragerði, segir að það séu vonbrigði að nýr meirihluti í borgarstjórn Reykjavíkur ætli að hefja rannsóknir að nýju í tengslum við Bitruvirkjun.

Stjórn Orkuveitunnar samþykkti á fundi sínum 20. maí síðastliðnum tillögu um að hætta undirbúningi við Bitruvirkjun. ,,Að fengnu áliti Skipulagsstofnunar á mati á umhverfisáhrifum Bitruvirkjunar samþykkir stjórn OR að hætta undirbúningi Bitruvirkjunar og að fresta öllum frekari framkvæmdum á svæðinu," segir í bókun stjórnarinnar. Í framhaldinu sagði Kjartan Magnússon, þáverandi stjórnarformaður Orkuveitunnar, að áformum um virkjun Bitru yrði ekki haldið áfram á kjörtímabilinu.

,,við vorum afskaplega ánægð með þá ákvörðun og töldum að borgarstjórn hefði breytt rétt og tekið mark á eindregnum vilja Íslendinga leyfi ég mér að fullyrða. Þannig að það veldur okkur miklum vonbrigðum að sjá þetta í nýjum málefnasamningi," segir Aldís.

Bæjarbúar hafa miklar áhyggjur af umhverfismengun og loftmengun, að sögn Aldísar sem segir að bæjarfélagið sé að fara fyrir stöðuna sem upp er komin.

,,Það hafa engar forsendur verið kynntar fyrir okkur sem gefa til kynna að eitthvað hafi breyst í þessu verkefni sem breytt getur okkar afstöðu. Við höfum ekki fengið kynningu á því að setja eigi upp nýjar mengunarvarnabúnað, flytja eigi borholur eða virkjunina. Sé verið að tala um framhald á virkjanaáformum eins og þau voru lögð upp fyrr á þessu ári þá teljum við að það sé afskaplega mikil skammsýni af borgarstjórn að fara af stað með þessum hætti," segir Aldís.

Aldís segir að hún hafi sent Hönnu Birnu Kristjánsdóttur bréf í vikunni þar sem Hveragerðisbær óskar eftir fundi um málið.

Aldísi líst ágætlega á nýjan meirihluta í Reykjavík. ,,Þetta er allt hið mætasta fólk. Ég treysti þeim til að gera góða hluti og þar á meðal að gera ekki neitt sem gæti skert lífsgæði annarra og þar er ég að tala um Bitruvirkjun."