Segist ekki hafa lagt drög að handtöku Jóns Ásgeirs

Haraldur Johannessen ríkislögreglustjóri segir það rangt sem fram hafi komið í fréttaskýringu DV þann 1. maí að hann hafi lagt drög að Jón Ásgeir Jóhannesson, stjórnarformaður Baugs, yrði handtekinn í framhaldi af húsleit hjá Baugi.

Í yfirlýsingu frá ríkislögreglustjóra segir að blaðamaður DV fullyrði í fréttaskýringunni að menn á vegum embættis ríkislögreglustjóra hafi verið sendir á Keflavíkurflugvöll til þess að handtaka Jón Ásgeir Jóhannesson og í kjölfar lögreglunnar hafi verið töku- og fréttamenn frá Ríkissjónvarpinu.

Ríkislögreglustjóri bendir á að þegar hafi komið fram í fjölmiðlum að hvorki fréttamenn né tökumenn frá Ríkissjónvarpinu voru á staðnum. Þá hafi ríkislögreglustjóri ekki stýrt aðgerðum vegna rannsóknar Baugsmálsins heldur saksóknari efnahagsbrotadeildar embættisins.

Ríkislögreglustjóri segir einnig rangt í skrifum DV að lögreglumenn frá embætti ríkislögreglustjóra hafi farið í Leifsstöð til þess að handtaka Jón Ásgeir Jóhannesson. „Það hefur verið kannað bæði hjá embætti ríkislögreglustjóra og hjá lögreglustjóranum á Keflavíkurflugvelli. Í fréttaskýringunni er sagt að ,,atburðarásin hafi vakið athygli og jafnvel hneykslan tollvarða og löggæslumanna á Keflavíkurflugvelli." Þetta er undarleg fullyrðing í ljósi þess að hvorki lögreglumenn frá embætti ríkislögreglustjóra né fulltrúar Ríkissjónvarpsins voru á staðnum," segir í tilkynningu ríkislögreglustjóra.

Fer embættið fram á að DV leiðrétti þessar rangfærslur sem fyrst.