Brotist inn í bifreiðar og hús í Bolungarvík

Síðastliðna nótt var brotist inn í bifreiðar og farið inn í hús á nokkrum stöðum í Bolungarvík. Átta tilkynningar hafa borist lögreglu vegna þessa í dag, en vitað er að farið var inn í sex bifreiðar og ýmsum munum stolið úr þeim. Til dæmis I-pod spilara og GPS tæki.

Í tilkynningu frá lögreglunni á Vestfjörðum segir að unnar hafi verið talsverðar skemmdir á einni bifreiðinni sem hafi staðið á hafnarsvæðinu í Bolungarvík en allar rúður í bifreiðinni hafi verið brotnar, ásamt ljósum og speglum, og hjómtækjum síðan stolið. Þessu til viðbótar sé vitað að menn hafi farið inn í tvö íbúðarhús í nótt en hlaupið svo á brott er húsráðendur vöknuðu og urðu varir við umgang.

Líklegt sé að menn þessir hafi verið á ferð um bæinn á tímabilinu þrjú til fimm um nóttina. Lögreglan biður þá sem urðu varir við grunsamlegar mannaferðir í Bolungarvík í nótt að hafa samband í síma 450-3730.