Búið að handtaka innbrotsþjóf Pálma - nýsloppinn úr fangelsi

Lögreglan handtók í dag Jón Einar Randversson sem braust inn á heimili Pálma Haraldssonar eiganda Securitas um miðjan dag í gær. Vísir sagði frá innbrotinu fyrr í dag og birti mynd af innbrotsþjófinum úr öryggismyndavél á heimili Pálma. Jón Einar hlaut sex mánaða fangelsisdóm árið 2007 en hann var m.a hluti af svokölluðu Árnesgengi sem fór í ránsferð um landið. Sá dómur bættist við fjórtán mánaða dóm sem Jón hlaut í nóvember árið 2006 vegna líkamsárása og fleiri dóma. Hann fótbraut einnig Hákon Eydal í árás innan veggja Litla Hrauns á þessu ári.

Friðrik Smári Björgvinsson yfirlögregluþjónn hjá lögreglunni á höfuðborgarsvæðinu staðfesti í samtali við Vísi að búið væri að handtaka innbrotsþjófinn sem hann sagði margsinnis hafa komið við sögu lögreglu. Honum var hinsvegar ekki kunngut um hvort lögreglan hefði haft upp á ránsfengnum, tveimur fartölvum og I-pod spilara.

Í Árnesgenginu svokallaða voru tíu manns á aldrinum fimmtán til 26 ára. Jón Einar var einn af þeim. Ákæruliðirnir í því máli voru alls 70 talsins, flestir vegna innbrota, annarra þjófnaða, fjársvika, fíkniefnamisferlis, eignarspjalla og mýmargra bílþjófnaða.

Jón Einar hlaut einnig eins árs dóm á þessu ári fyrir að hafa í félagi við annan fanga á Litla-Hrauni ráðist á Hákon Eydal refsifanga. Hákon fékk 16 ára fangelsisdóm fyrir morð á Sri Ramawati árið 2005. Árásin átti sér stað innan veggja fangelsins en þeir deildu um brugg. Sparkaði Jón ítrekað í Hákon með þeim afleiðingum að hann fótbrotnaði.