Móðgun við Íslendinga að láta Breta sjá um varnir

Fyrirhuguð koma breskra herflugvéla til Íslands í árslok er, í ljósi nýjustu atburða, móðgun við Íslendinga. Þetta segir í ályktun Kjördæmissambands framsóknarmanna í norðausturkjördæmi sem þingaði á Egilsstöðum um helgina.

Framsóknarmenn í norðausturkjördæmi segja að Bretar, sem beitt hafi hryðjuverkalöggjöf gegn íslenskum fyrirtækjum og sagt íslenska ríkið gjaldþrota, geti ekki talist vinveitt ríki og því geti ekki verið eðlilegt að breskir hermenn stígi fæti á íslenska grund.

Í stjórnmálaályktun, sem samþykkt var, segir að kjördæmisþingið styðji samstarf við Alþjóðagjaldeyrissjóðinn við þessar aðstæður og telji Ísland ekki eiga annan kost í þeirri viðleitni að endurheimta fyrri stöðu í alþjóðasamfélaginu. Kjördæmisþingið átelji þann seinagang sem verið hafi í viðræðum við sjóðinn og telji að mikil verðmæti hafi farið forgörðum á síðustu vikum vegna þessa. Allt bendi til að átök milli ríkisstjórnarflokkanna og neikvæð afstaða fomanns bankastjórnar Seðlabankans hafi seinkað ferlinu.

Framsóknarmenn segja að í ljósi breyttra aðstæðna í þjóðfélaginu skuli nú þegar hafinn undirbúningur, samningsmarkmið skilgreind og síðan farið í samningaviðræður um inngöngu í Evrópusambandið. Niðurstöður skuli lagðar í þjóðaratkvæði.