Vantar herslumuninn í gróðurhús á Litla-Hraun

„Þetta er alveg að takast," sagði Auður I. Ottesen, ritstjóri Sumarhússins og garðsins, sem enn stendur í ströngu við að safna fé fyrir gróðurhúsi handa föngum á Litla-Hrauni. Auður segir tæpa hálfa milljón hafa safnast en hún setji stefnuna ótrauð á 750.000 krónur. Gróðurhúsið er tilbúið til afhendingar og nú er bara beðið eftir því að greiðslan verði til reiðu.

„Svo stuðlaði ég að því að koma einum stráknum í garðyrkjuskólann sem heitir reyndar núna Landbúnaðarháskóli Íslands. Hann er utanskóla en fer þrisvar á önninni í skólann heila viku," útskýrir Auður.

Til eru fræ

Hún segir margt jákvætt hafa gerst í málinu, til dæmis hafi Bolli Thoroddsen, varaborgarfulltrúi í Reykjavík, sem starfaði á Litla-Hrauni sem fangavörður í afleysingum, lagt söfnuninni lið með 250.000 króna framlagi en hann hefur að sögn Auðar mikinn áhuga á úrbótum í fangelsum, hvort sem um sé að ræða vinnuaðstöðu fanga eða aðstöðu þeirra til tómstundastarfa.

Þá hafi eigendur Innigarða ehf. lagt málefninu lið með því að gefa Litla-Hrauni ræktunarkerfi með lýsingu og öllum fylgibúnaði auk sáningarkassa og fræja af tómötum og gúrkum.

Söfnunin er enn í fullum gangi. Allir þeir sem vilja leggja málefninu lið geta haft samband við Auði I. Ottesen í síma 578-4800 eða á netfangið audur@rit.is eða lagt inn á reikning 111-26-171717, kt. 481203-3330.