Mótmælandi ákærður fyrir árás á lögreglumann

Ríkissaksóknari mun ákæra Ágúst Fylkisson fyrir árás á lögregluþjón í starfi. Málið gegn honum verður þingfest í Héraðsdómi Reykjavíkur á miðvikudag í næstu viku, samkvæmt dagskrá.

Ágúst réðst að lögreglumanninum á Kirkjusandi í apríl eftir að hörð mótmæli bílstjóra höfðu farið fram við Rauðavatn. Lögreglumaðurinn nefbrotnaði og tognaði á hálsi.

Vísir hefur ekki náð tali af Ágústi vegna málsins en skömmu eftir atvikið baðst hann afsökunar á framferði, meðal annars í samtali við Vísi. Á vefsíðu sem bílstjórar settu upp vegna mótmælanna sagðist hann hafa misst stjórn á skapi sínu vegna þess að hann hafi ekki fengið afhenta kylfu sem lögregla tók af honum á staðnum.