Dæmdur fyrir að draga sér fé af reikningi knattspyrnufélags

Héraðsdómur Suðurlands hefur dæmt karlmann í eins mánaðar fangelsi sem skilorðsbundið er til tveggja ára fyrir að hafa dregið sér fé af reikningi Knattspyrnufélagsins Árborgar.

Alls var um að ræða um 360 þúsund krónur og dró maðurinn sér fjármunina á vordögum í fyrra. Hann játaði brot sitt fyrir dómi og greindi frá því að hann hefði greitt til baka 75 þúsund krónur. Kvaðst hann ekki hafa fengið nægjanlegt svigrúm til að endurgreiða féð.

Knattspyrnufélagið gerði kröfu um skaðabætur upp á 285 þúsund en henni var vísað frá dómi. Byggðist það á því að maðurinn viðurkenndi bótakröfuna að hluta en sagði hluta af fénu sem hann væri sakaður um að hafa dregið sér hafa verið greidd laun með samþykki stjórnar knattspyrnufélagsins.