Hlaupa 170 kílómetra um Mont Blanc

Fjórir Íslendingar eru komnir til Chamonix í Frakklandi til þess að taka þátt í Tour Du Mont-Blanc fjallahlaupinu. Hlaupið er tæpir 170 kílómetrar með um 10 kílómetra hækkun. Hlaupaleiðin liggur í gegnum þrjú lönd, Frakkland, Sviss og Ítalíu.

Þeir Börkur Árnason, Birkir Árnason og Ásgeir Elíasson ætla að hlaupa allan hringinn en Bryndís Baldursdóttir mun hlaupa hálfan hring sem er 98 kílómetrar og samtals 5400m. hækkun. Þar eru tímamörkin 26 klst.

Í tilkynningu frá þeim segir að Börkur og Birkir hafi báðir farið þetta hlaup áður. Birkir hafi hlaupið hálfan hring í fyrra á 18 klukkustundum og 32 mínútum og Börkur hafi farið heilan hring á 35 klukkustundum og 41 mínútu. Ásgeir hafi farið Ironman og ACT, sem er 5 daga ævintýrakeppni á Grænlandi. Bryndís Baldursdóttir sé eina íslenska konan sem hafi farið Ironman. Hún hafi einnig hlaupið 100 kílómetra hlaup í mars.